Welkom op onze vernieuwde pagina!

NUIE SIRREMONIEMEISTER EN OETBELDER

Gepubliceerd op 24 april 2021 om 12:19

De Tempeleers pakke door: nuie sirremoniemeister en oetbelder
Stadscarnevalsvereineging De Tempeleers loert, oondanks alle coronabeperkinge bij de Vastelaovend 2021, trök op e good sezoen. De algemein reaktie op de gebooje aktiviteite waor zier positief: ‘t volk vaan Mestreech had brei waardering veur ‘t alternatief program. Um die ervaringe, en bijbehurende waardering, ouch in de koumende jaore te kinne continuere, goon de Tempeleers d’n ingezatte koers veurtzètte.

Daobij pas ouch nui blood: Georges van Zeijl en Armand Peereboom trejje touw tot de vereineging.
Sirremoniemeister
Remy Rousseau heet in ‘n ieder stadium aongegeve zienen termijn es sirremoniemeister neet te verlenge. Heer kós dees rol helaas neet mie combinere mèt zien drökke wèrkzaomhede en heet daorum verzeuk ‘nen opvolger veur häöm te zeuke. Heer blijf wel aon es Tempeleer.
‘n Zeukkemissie vaan de Tempeleers heet daodoor de aofgeloupe maonde oetgebreid d’n tied gehad um ‘ne nuie sirremoniemeister (tevens otoriteitentoeker) te zeuke. Daobij is me oetgekoume bij Georges van Zeijl. Van Zeijl is geinen oonbekinde vaan de Tempeleers. President Bastiaan Klomp: ”Georges is al vaanaof de opriechting lid vaan eus Sósjeteit veur Medaajes en Sjariteit en v’r höbbe häöm dao liere kinne es ‘nen humoristische en gooje spreker dee lui vaan allerlei pluimages wèt te rake. Zègk mer de basisvaardeghede vaan ‘ne sirremoniemeister.” Georges van Zeijl, in ‘t daogeleks leve eigeneer vaan Tripels Avvekaote, is op zien beurt gruuts op zien beneuming: “Es klein menneke luusterde iech al via ‘nen transistorradio nao de Machseuverdrach vaan Bert Beenkens en druimde iech devaan um dat oets zelf nog ‘ns te kinne doen. Wie me miech benaoderde en vroog, waor iech daan ouch verierd. Iech wèl miech deneve netuurlek ouch verdeenstelek make es Tempeleer en miech inzètte veur ‘t behaajd vaan de sjieke traditie vaan Vastelaovend”.
Oetbelder
Odin Wijnhoven waor jaorelaank ‘t vast geziech vaan de Tempeleers in de beriechgeving nao boete touw. Zienen termijn es oetbelder (woordvoerder) leep aof, en Wijnhoven gaof al e paar maond geleie aon ziech neet herkeesbaar te stèlle. Wijnhoven combineert dees funktie mèt die vaan veurzitter Kanselarijraod. “Iech höb ‘t woordvoerdersjap mèt hiel väöl plezeer en voldoening gedoon, meh ‘t invölle vaan die rol same mèt ‘t veurzittersjap vaan de Kanselarijraod is ‘n te groete belasting.” Wijnhoven weurt opgevolgd door ‘nen ‘awwe’ bekinde vaan De Tempeleers. Aajd- Stadsprins Armand Peereboom (2019) nump de oetbelder-take vaan Wijnhoven euver. Armand Peereboom: ”Iech bin al jaore betrokke es börgermètwèrker (vrijwèlleger/gei lid, red.) bij De Tempeleers. Wie me in miech d’n ideaolen opvolger vaan Odin zaog, hoofde iech daan ouch neet lang na te dinke. De Tempeleers vörme ‘n helwèrkende club vrijwèllegers die alles zoe professioneel meugelek aonpakke. Dao huurt e good media- en peersbeleid bij. Iech hoop d’n ingeslage weeg wijer door te kinne zètte en mien bijdrage aon dees sjieke club te kinne lievere”.
Van Zeijl en Peereboom weure tijdens de Start vaan ’t Vijfde sezoen op 14 november 2021 (oonder veurbehaajd), same mèt de veureg jaor touwgetrooje Tempeleers Sjors Bonnemayer, Bermón Pooters en John Albertz geïnstalleerd in aonloup nao ‘t zjubileisezoen 2022-2023 (7x 11 jaar).


«   »

Reactie plaatsen

Reacties

Er zijn geen reacties geplaatst.